سید وارث شاہ ہوری مولا حسن تے مولا حسین دی شان وچ آکھدے نیں:
حضرت حسن حسین دی ذات عالی، علی شیر خدا دے شیر دونویں
لختِ جگر رسول بتول جائے، عاشق رب دے مرد دلیر دونویں
دوہتروان حبیب خدا دے نی اُچّی جد دے وڈ وڈیر دونویں
رب پاک آیت قدسی بھیج دتی ہوئے شرک توں پرے پریر دونویں
جنہاں کدی سوال نہ رد کیتا وِکّے راہ مولی کئی دیر دونویں
منزل عشق دی جنہاں ثبوت کیتی، مڑے ذرہ ناہیں قدم پھیر دونویں
تیغ عشق دی نال شہید ہوئے، کُٹھے ظالماں موذیاں گھیر دونویں
گنج ظاہری باطنی دولتاں دے، ہوئے وچ میدان دے ڈھیر دونویں
درجے پاک شہادت دے رب بخشے، عالی قدر تے چنگ چنگیر دونویں
روز حشر دے اُمتی عاصیاں دی بخشش واسطے ہون اگیر دونویں
مہربان تمامیاں مومناں دے مددگار نے سنج سویر دونویں
حل مشکلاں وارثا کُل کردے ہتھو ہتھ نہ لاوندے دیر دونویں
No comments:
Post a Comment