نظم
(بابو فیروز دین شرف)
میں پنجابی ، پنجاب دا رہݨ والا
ہاں پر پینڈو ، پر شہریے ڈھنگ دا ہاں
سمجھاں فارسی ، اردو وی خوب بولاں
تھوڑی بہتی انگریزی وی انگدا ہاں
بولی اپݨی نال پیار رکھاں
موتی کسے پنجابݨ دی نتھ دا ہاں
ملے مان پنجابی نُوں دیش اندر
عاشق مڈھوں میں ایس اُمنگ دا ہاں
وارث شاہ تے بُلّھے دے رنگ اندر
ڈوب ڈوب کے زندگی رنگدا ہاں
رہواں ایتھے تے یو-پی وچ کراں گلّاں
ایسی گل نُوں چھِکے تے ٹنگدا ہاں
میں پنجابی ، پنجابی دا شرف سیوک
سدا خیر پنجابی دا منگدا ہاں
No comments:
Post a Comment