پنجابی دی موہرلی نثری کتاباں

 پنجابی دے موہرلی نثری کتاباں

مواعظ نوشہ پیر پنجابی نثر دا ہُن تک کھوجیا جان والا سب توں پہلا نثری نمونہ اے۔ ایہہ مواعظ 990ھ/1582ء وچ لکھے گئے۔ [1]

دوجا نثری نمونہ پکی روٹی (خرد) اے جیہدے مصنف دا پتہ نہیں اے۔پکی روٹی خرد وارث شاہ دے زمانے دے لاگے 1766ء وچ لکھی گئی اے۔ ایس نوں ڈاکٹر شہباز ملک ہوراں مرتب کیتا اے۔ اونہاں دی پرکھ پڑچول موجب پکی روٹی خرد رسالہ قاضی قطب جہڑا کہ فارسی وچ سی ، توں  پنجابی نثر وچ ماخوذ جیہا ترجمہ اے۔ رسالہ قاضی قطب دا ذکر وارث شاہ نے  "ہیر وارث شاہ" وچ وی کیتا اے:
قاضی کتب تے کنز ، انواع باراں مسودیاں جلد سواریا نیں  [2]

اوس توں بعد پنجابی دا نثر نگار حافظ برخوردار نوں منیا جاندا اے جنہاں نے 1136ھ وچ "بوہل نماز" لکھی جیہڑی تیراں صفحیاں دی نکی جنی کتاب اے جیہڑی 1176ھ دے لاگے لکھی گئی لگدی اے۔ ایہہ کتابڑی 1974ء وچ پروفیسر احمد حسین احمد قریشی قلعداری ہوراں چھپوائی سی۔[2]

حافظ برخوردار ذات دے رانجھا تے حافظ قرآن ہون پاروں حافظ برخوردار رانجھا اکھواندے سن۔ ایہہ تخت ہزارے دے رہن والے سن۔ سیالکوٹ توں علم دی تکمیل کیتی کُجھ عرصہ ایہہ رسول نگر وچ رہے۔ اوہناں نے اسلامی فقہ دیاں بہت ساریاں کتاباں تحریر کیتیاں جیہڑیاں انواع حافظ دے ناں نال اجے قلمی صورت وچ ای ڈاکٹر احمد حسین قریشی قلعداری ہوراں دے کتب خانے وچ موجود نیں۔ ایہناں دی قبر چٹی شیخاں سیالکوٹ وچ اے۔[3]

سومے:
[1] ادب پھوار ، قدر آفاقی ، نیو بک پیلس ، اردو بازار لاہور ، صفحہ 347
[2] ادب پھوار ، قدر آفاقی ، نیو بک پیلس ، اردو بازار لاہور ، صفحہ 351
[3] چونواں پنجابی ادب ، تاج بک ڈپو اردو بازار لاہور، صفحہ 195