غفلت نامہ
(شاہ مراد خانپوری)
(تریخ پیدائش: مغل بادشاہ شاہجہاں دے دور حکومت وچ خانپور چکوال وچ جمے ، تریخ وفات: 1114 ھجری بمطابق 1702عیسوی[1])
سُتّا ہیں تاں جاگ بندیا غافلا
آ تماشا ویکھ چلیا قافلا
سُتّا ہیں تاں جاگ بندیا عاصیا
اپنا آپ سنبھل کوسنگ نہ جاسیا
سُتّا ہیں تاں جاگ وت نہ آوسیں
اپنا کم سنوار پچھوتاوسیں
سُتّا ہیں تاں جاگ رب جپ رات نوں
رب پُچھیسی عمل نہ کہ ذات نوں
سُتّا ہیں تاں جاگ بوہتا سووسیں
ہو نہ اتنا شاد بوہتا رووسیں
آ تماشا ویکھ اِس سنسار دا
کر لے سودا زُود اِس بازار دا
شاہ مراد آ ویکھ وقت صباح دا
مرغ کوُکن یاد نام اللہ دا
سوما: پنجابی اختیاری نوویں دسویں جماعت لئی ، صفحا 52
پنجاب کریکولم اینڈ ٹیکسٹ بُک بورڈ ، لاہور
[1] کلام شاہ مراد خانپوری مرتب انور بیگ اعوان ، بزم ثقافت چکوال
